पनवेल परिसरात दोन वेगवेगळ्या अपघातात 2 ठार 1 जखमी....
पनवेल, दि.18 (संजय कदम) ः पनवेल परिसरात झालेल्या दोन वेगवेगळ्या अपघातात 2 ठार 1 जखमी झाल्याची घटना घडली आहे.
पनवेल जवळील जेएनपीटी मार्गावरील बंबावी पाडा येथील साई विभुती ढाब्यासमोर आज सकाळी एका ट्रेलरने त्याच्या पुढे चाललेल्या होंडा डिओ स्कुटी गाडीस पाठीमागून धडक दिल्याने झालेल्या अपघातात फिर्यादी निलेश कमल सिंग (25) हा जखमी झाला आहे तर त्याचा सहकारी अक्षय घोले (25) हा गंभीररित्या जखमी होवून मयत झाला आहे. तर दुसर्‍या घटनेत पनवेल शहरातील मालधक्का रोड येथून पायी जात असलेल्या मुंबई दलात पोलीस शिपाई म्हणून कार्यरत असणारे शिवाजी सानप यांना एका अज्ञात वाहनाची धडक बसून ते गंभीररित्या जखमी झाले. त्यांना उपचारार्थ रुग्णालयात दाखल केले असता तेथे त्यांचा मृत्यू झाला आहे. या दोन्ही अपघाताची नोंद पनवेल शहर पोलीस ठाण्यात करण्यात आली आहे.
