ऑनलाईन टास्कच्या नावाखाली साडे १४ लाखाची फसवणूक....
पनवेल दि.२१ (संजय कदम) : सोप्या ऑनलाइन टास्क पूर्ण करा आणि घरबसल्या अतिरिक्त उत्पन्न मिळवा अशा आशयाचे फसवे आश्वासन देत पळस्पे येथील एका ४२ वर्षीय इसमाची त्रिकुटाने साडे चौदा लाखांची फसवणूक केल्याची घटना घडली आहे. याप्रकरणी पनवेल शहर पोलीस ठाण्यात गुन्हा दाखल करण्यात आला आहे.
कोरोनानंतर अनेक जण नोकऱ्या मिळवण्यासाठी प्रयत्नात असतात. त्यातच प्रत्येक क्षेत्रात वर्क फ्रॉम होम संकल्पना रुजली आहे. याचा फायदा घेत सायबर चोरटे घरबसल्या उत्पन्न मिळवून देण्याच्या नावाखाली अनेकांची फसवणूक करत असल्याची घटना घडत आहे. पनवेल परिसरातील पळस्पेफाटा येथील मॅरेथॉन नेक्सझोन इमारतीत राहणारे आनंद पांडुरंग पाटील (वय ४२) यांची सुद्धा अश्याप्रकारे फसवणूक झाली आहे. सोप्या ऑनलाइन टास्क पूर्ण करा आणि घरबसल्या अतिरिक्त उत्पन्न मिळवा अशा आशयाचे फसवे आश्वासन देत आरोपी जिया मिश्रा, मनिषा त्रिपाठी, अलीना इसाबेला यांनी आनंद पाटील यांना टास्कमध्ये गुंतवणूक करण्याचे सांगून त्यांच्याकडून १४ लाख ४३ हजार ९०० रुपये उकळूले. वारंवार पैश्याची मागणी केल्यानंतरही पैसे मिळत नसल्याने आपली फसवणूक झाल्याचे लक्षात येताच आनंद पाटील यांनी पनवेल शहर पोलीस ठाणे गाठत तिघांविरोधात गुन्हा दाखल केला आहे. या घटनेचा अधिक तपास वरिष्ठ पोलीस निरीक्षक नितीन ठाकरे यांच्या मार्गदर्शनाखाली सहा. पोलीस निरीक्षक श्रीकांत शेंडगे करीत आहेत.
