उलवे, ता. 17 : पनवेल तालुका काँग्रेस कमिटी अंतर्गत पर्यावरण विभागाच्या उपाध्यक्षपदी कालीवली-चावणे येथील दिनकर झिपरू देसाई यांची नियुक्ती करण्यात आली आहे. नियुक्ती पत्र काँग्रेसचे जिल्हाध्यक्ष महेंद्रशेठ घरत यांनी गुरुवारी शेलघर येथील 'सुखकर्ता' बंगला येथे प्रदान केले.ही नियुक्ती महाराष्ट्र प्रदेश काँग्रेस कमिटी पर्यावरण विभागाच्या वतीने करण्यात आली आहे. काँग्रेसच्या बळकटीकरणासाठी आणि पर्यावरण विभागाच्या विकासासाठी देसाई यांनी भरीव काम करावे, अशी अपेक्षा काँग्रेसच्या वतीने व्यक्त करण्यात आली आहे. यावेळी काँग्रेस कार्यकर्ते सिताराम माळी, पर्यावरण विभागाचे राजीव पाटील उपस्थित होते. दिनकर देसाई यांच्या निवडीबद्दल आंतरराष्ट्रीय कामगार नेते महेंद्रशेठ घरत आणि काँग्रेस कार्यकर्त्यांनी अभिनंदन केले.
