गुढीपाडव्याच्या निमित्ताने शिवचरित्राचा भव्यदिव्य कार्यक्रम
पनवेल / प्रतिनिधी - : पनवेल येथील कल्पतरू सोसायटीमध्ये गुढीपाडव्याच्या निमित्ताने शिवचरित्राचा भव्यदिव्य कार्यक्रम पार पडला. हा सोहळा म्हणजे हिंदवी स्वराज्याच्या तेजस्वी इतिहासाचं सजीव चित्रण होते. पनवेलचे आमदार प्रशांत ठाकूर, ब्रह्माजी, आणि संपूर्ण सांस्कृतिक कमिटी यांच्या नेतृत्वाखाली कल्पतरूने गेल्या दहा वर्षांत विलक्षण प्रगती केली असून गुढीपाडव्याच्या निमित्ताने या ठिकाणी सांस्कृतिक कार्यक्रमांची रेलचेल होती.
श्रीरामाच्या युगापासून सुरू झालेली गुढीपाडव्याची परंपरा, छत्रपती शिवाजी महाराजांनी हिंदवी स्वराज्याच्या माध्यमातून नव्या उंचीवर नेली. हाच वारसा जपत कल्पतरू सोसायटीतील बालगोपाळ, तरुण, प्रौढ आणि सत्तरी पार केलेल्या आजी-आजोबांपर्यंत सर्वांनी या सोहळ्यात उत्स्फूर्त सहभाग घेतला. त्यांच्या अभिनयाने शिवरायांचा जन्म, बालपण, स्वराज्यस्थापना आणि राज्याभिषेकाचे तेजस्वी क्षण अनेकांच्या डोळ्यासमोर उभे राहिले. रोशन आंग्रे, रेवा आंग्रे यांनी कोरिओग्राफी केली होती. मराठी आणि इतर भाषिक या सर्वांनी ऐतिहासिक कार्यक्रमाची मुक्तकंठाने प्रशंसा केली.
