पनवेल, दि.21 (वार्ताहर) ः आगामी काळात येवू घातलेल्या पनवेल महानगरपालिका निवडणुकीत स्वाभिमानी युथ रिपब्लिकन पार्टी निवडणूक लढविणार असल्याची माहिती जिल्हाध्यक्ष महेश साळुंखे यांनी कार्यकर्त्यांच्या बैठकीमध्ये दिली.
या संदर्भात त्यांच्या पक्षाची बैठक पनवेलमध्ये आयोजित करण्यात आली होती. यावेळी उपस्थित कार्यकर्त्यांना मार्गदर्शन करताना महेश साळुंखे यांनी सांगितले की, आंबेडकरी चळवळीतील सर्व कार्यकर्त्यांना सोबत घेवून आगामी महानगरपालिका निवडणूक लढविली जाईल. त्याचबरोबर समविचारी पक्षाशी युती करण्याचा विकल्प सुद्धा खुला ठेवलेला आहे. पनवेल महानगरपालिकेची स्थापना 5 वर्षापूर्वी झालेली आहे. असे असले तरी अनेक मागासवर्गीयांचे प्रश्न प्रलंबित आहेत. या समाजाला न्याय देण्यासाठी व समाजातील तरुणांना मुख्य प्रवाहात आणण्याच्या उद्देशाने तसेच महिलांच्या उन्नतीचा प्रश्न, बेरोजगाराचा प्रश्न आदी विषया संदर्भात पक्ष न्याय मिळविण्यासाठी ही निवडणूक लढविणार आहे. या संदर्भात लवकरच प्रभागनिहाय बैठका घेवून पदाधिकारी जाहीर करण्यात येणार आहेत. त्याचप्रमाणे पनवेल परिसरात कार्यकर्त्यांचा मेळावा, महिला आघाडी मेळावा व इतर कार्यक्रम राबविण्यात येणार असल्याची माहिती जिल्हाध्यक्ष महेश साळुंखे यांनी दिली.
फोटो ः महेश साळुंखे
