करंजाडे ग्रामसभेत दारूबंदीचा ठराव मंजूर
पनवेल वैभव वृत्तसेवा ः
पनवेल तालुक्यातील करंजाडे ग्रामपंचायत हद्दीमध्ये दारूबंदी लागू करण्यासाठीचा ठराव ग्रामसभेत मंजूर करण्यात आला. याबाबत जिल्हाधिकार्यांना पत्राद्वारे कळवण्यात आले आहे. तसेच मुख्य कार्यकारी अधिकारी, अलिबाग, तहसीलदार पनवेल, गटविकास अधिकारी यांना देखील त्याची प्रत देण्यात आली आहे.
करंजाडे ग्रामपंचायत हद्दीत अनेक ठिकाणी दारू विक्री होते. त्यामुळे येथील तरुण दारूच्या आहारी जाऊन नवजात पिढी व्यसनाधीन होत आहे. तसेच गावातील दारू विक्रीमुळे अनेक महिलांचे संसार उद्ध्वस्त झाले आहेत. याबाबत ग्रामपंचायतीकडे तक्रार अर्ज दाखल आहेत. करंजाडे वसाहतीच्या मुख्य प्रवेशद्वाराजवळ रस्त्याशेजारी दारू विक्रीचे दुकान असल्याने गावातील महिलांना त्याचा त्रास होतो. तसेच येथे थांबणार्या वाहनांमुळे वाहतूक कोंडी होते, शिवाय अपघात व चोर्यांचे प्रमाण वाढले आहे. दुकानाच्या शंभर मीटरच्या आत एक शाळा आहे. येथील शाळेतील मुलांवर त्याचा दुष्परिणाम होण्याची शक्यता नाकारता येत नाही. करंजाडे ग्रामपंचायत हद्दीमध्ये दारूबंदी लागू करण्याबाबतचा ठराव सर्वानुमते मंजूर केल्याची उपसरपंच सागर आंग्रे व ग्रामविकास अधिकारी सुदिन पाटील यांनी दिली. संपूर्ण करंजाडेमध्ये दारू बंदी करण्यासाठी सर्वानुमते ठराव मंजूर करण्यात आल्याचे सरपंच मंगेश शेलार यांनी सांगितले.
