पनवेल मधून खा.श्रीरंग बारणे यांचे पारडे जड ; ग्रामीण भागातही उत्स्फूर्त प्रतिसाद
पनवेल (प्रतिनिधी) भारतीय जनता पक्ष, शिवसेना, राष्ट्रवादी काँग्रेस, मनसे, आरपीआय, पीआरपी, रासप व मित्रपक्षाचे ३३ मावळ लोकसभा मतदार संघाचे अधिकृत उमेदवार श्रीरंग आप्पा बारणे यांच्या प्रचारार्थ माजी खासदार लोकनेते रामशेठ ठाकूर यांच्या मार्गदर्शनाखाली आणि मावळ लोकसभा निवडणुक प्रमुख आमदार प्रशांत ठाकूर यांच्या नेतत्वाखाली पनवेल विधानसभा मतदार संघात जोरदार प्रचार करण्यात येत आहे. त्या अनुषंगाने आज (गुरुवारी) पनवेल ग्रामीण भागात झालेल्या झालेल्या प्रचार दौऱ्याला व चौकसभांना मतदार नागरिकांचा जोरदार उत्स्फूर्त प्रतिसाद लाभला असून पनवेल मधून खासदार श्रीरंग बारणे यांचे पारडे जड झाले आहे.
आज पनवेल विधानसभा मतदार संघातील ग्रामीण भागात झालेल्या प्रचार दौऱ्यालाही मतदार ग्रामस्थांनी भरभरून प्रतिसाद दिला. शेडुंग येथील हनुमान मंदिरात दर्शनघेऊन प्रचार दौऱ्याला सुरुवात झाली. पुढे बेलवली, लोणीवाली, वांगणी, आंबिवली, नेरे असा प्रचार दौरा झाला.त्यानंतर वाजे येथे चौकसभा झाली. त्यानंतर शिवणसई, दूंदरे, रिटघर, खानाव, मोर्बे, महालुंगी, चिंध्रण, पालखुर्द, वावंजे येथे प्रचार दौरा त्यानंतर खैरणे येथे चौकसभा होऊन पुढे नितळस, तोंडरे, पेंधर येथे प्रचार दौरा आणि नंतर नावडे व फेज २ ची चौकसभा झाली.या प्रचार दौऱ्यात उमेदवार खासदार श्रीरंग बारणे, मावळ लोकसभा निवडणूक प्रमुख आमदार प्रशांत ठाकूर, भाजपचे प्रदेश सदस्य बाळासाहेब पाटील, भाजपचे उत्तर रायगड जिल्हाध्यक्ष अविनाश कोळी, तालुकाध्यक्ष अरुणशेठ भगत, माजी महापौर कविता चौतमोल, महानगरपालिकेचे माजी सभागृहनेते परेश ठाकूर, शिवसेनेचे जिल्हाप्रमुख रामदास शेवाळे, संतोष भोईर, महानगरप्रमुख प्रथमेश सोमण, राष्ट्रवादी काँग्रेसचे प्रदेश सरचिटणीस भीमसेन माळी, सुनील फडके, भाजपचे जिल्हा सरचिटणीस ऍड प्रकाश बिनेदार, चारुशीला घरत, तालुका प्रमुख रुपेश ठोंबरे, मनसेचे तालुका प्रमुख रामदास पाटील, राष्ट्रवादी तालुकाध्यक्ष दर्शन ठाकूर, भाजपचे तालुका उपाध्यक्ष संजय पाटील, सरचिटणीस राजेंद्र पाटील, प्रल्हाद केणी, भूपेंद्र पाटील, ओबीसी सेलचे जिल्हाध्यक्ष राजेश गायकर, जिल्हा सरचिटणीस दशरथ म्हात्रे, युवा मोर्चाचे जिल्हाध्यक्ष मयुरेश नेतकर, माजी जिल्हा परिषद अमित जाधव, एकनाथ देशेकर, माजी पंचायत समिती सदस्य राज पाटील, महिला मोर्चाच्या शहर अध्यक्षा राजेश्री वावेकर, जिल्हा सरचिटणीस संध्या शारबिद्रे यांच्यासह महायुतीचे पदाधिकारी कार्यकर्ते स्थानिक लोकप्रतिनिधी मोठ्या संख्येने सहभागी झाले होते. यावेळी जागोजागी स्वागत करण्यात येत होते आणि भरघोस मतांनी विजयाची खात्री यावेळी स्पष्टपणे अधोरेखीत झाली. भारत माता की जय, वंदे मातरम्, अबकी बार चारसौ पार, फिर एक बार मोदी सरकार, आप्पा बारणे आगे बढो हम तुम्हारे साथ है, अशा गगनभेदी घोषणा यावेळी देत पदाधिकारी व कार्यकर्त्यांनी आसमंत दणाणून सोडला होता. हा उत्साह मतदान होईपर्यंत कायम ठेवण्याच्या सूचना देतानाच सर्वात जास्त लीड देण्याचा निर्धार आपण सर्वांनी केल्याचे आमदार प्रशांत ठाकूर यांनी सांगितले आणि तशा प्रकारे महायुतीच्या प्रत्येक कार्यकर्त्याने जागरूक राहण्याचे आवाहन केले.
आमदार प्रशांत ठाकूर यांनी पनवेल विधानसभा मतदार संघात केलेली विकासकामे जमेची बाजू - खासदार श्रीरंग बारणे
देशाचा सर्वात मोठा उत्सव लोकसभा निवडणुक आहे. या अनुषंगाने केंद्र सरकारच्या माध्यमातून लोकहिताचे अनेक निर्णय आणि योजना राबविल्या जातात. आणि लोकशाहीच्या रूपाने देशाचे लोकप्रिय पंतप्रधान नरेंद्रजी मोदी हे प्रत्यक्ष कामातून कृती करण्याचे काम करत आहेत. पाचशे वर्षांपासून सुरू राहिलेल्या राम मंदिराची लढाई जिंकण्याची आणि न्याय देण्याचे काम मोदीजींनी केले आहे. देशाची संस्कृती परंपरा वृध्दींगत करण्याबरोबरच सर्व सामान्य माणसाच्या आयुष्यात चांगले दिवस आणण्याचे काम करत देशाचे नाव जगात उज्वल करण्याचे आणि देशाला जागतिक पातळीवर मोठी उंची देण्याचे काम पंतप्रधान नरेंद्रजी मोदी यांनी केले आहे. पुन्हा त्यांच्या नेतृत्वाखाली केंद्रात काम करण्याची आणि लोकसभा मतदार संघातील लोकांचे प्रश्न मांडण्यासाठी आणि विकासाची गंगा यापुढेही सुरू ठेवण्यासाठी आपले बहुमूल्य मत मला द्या, असे आवाहनही खासदार श्रीरंग बारणे यांनी यावेळी मतदारांना केले.
केंद्र सरकारच्या माध्यमातून अनेक योजना आणि विकासकामे मावळ लोकसभा मतदार संघाचा लोकप्रतिनिधी म्हणून केल्याचे त्यांनी नमूद करून आमदार प्रशांत ठाकूर यांनी पनवेल विधानसभा मतदार संघात केलेली विकासकामे आपल्या जमेची बाजू असल्याचेही त्यांनी यावेळी अधोरेखित केले.
पाठीमागील अडीच वर्षे सत्तेत असतानाही विरोधकासारखे होतो असा टोला त्यांनी उद्धव ठाकरे यांचे नाव घेता लगावला.तसेच केंद्रातून पंतप्रधान नरेंद्रजी मोदी तर राज्यात मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजितदादाची ताकद जनकल्याणासाठी खंबीरपणे उभी आहे, अशी प्रतिक्रियाही त्यांनी यावेळी दिली.गेली दोन टर्म माझ्यावर विश्वास टाकून विजयी केले आणि यावेळीही प्रचंड मतांनी विजयी कराल अशी खात्रीही त्यांनी व्यक्त केली.
विक्रमी मताधिक्याने खासदार श्रीरंग आप्पा बारणे विजयी होणार - आमदार प्रशांत ठाकूर
देशाचे पंतप्रधान नरेंद्रजी मोदी यांनी सर्वसामान्यांचा विचार करून त्यांच्या प्रगतीसाठी लोकाभिमुख कार्य केले आहे त्याच अनुषंगाने खासदार श्रीरंग आप्पा बारणे यांनी मावळचे प्रतिनिधित्व करत लोकसभा मतदार संघाचा विकास केला आहे, त्यामुळे खासदार श्रीरंग आप्पा बारणे विक्रमी मताधिक्याने विजयी होतील, असा विश्वास भाजपचे मावळ लोकसभा निवडणूक प्रमुख आमदार प्रशांत ठाकूर यांनी यावेळी व्यक्त केला. पंतप्रधान नरेंद्रजी मोदी यांनी कोविड काळापासून देशातील नागरिकांना मोफत अन्न धान्य दिले आणि यापुढील पाच वर्षेही दिले जाणार आहे. प्रत्येक शेतकऱ्याला दरवर्षी सहा हजार रुपये दिले जात आहेत आणि त्यामध्ये मुख्यमंत्री एकनाथ शिंदे यांनी मोदीजींच्या पावलावर पाऊल टाकत आणखी सहा हजार रुपयांची आणखी जोड दिली आहे त्यामुळे आता दरवर्षी शेतकऱ्यांना बारा हजार रुपये मिळत आहेत. गॅस सिलेंडर, शौचालय, जलजीवन मिशन, घरकुल, गर्भवती महिलांना मातृ वंदन योजना, अशा अनेक योजना अंमलात आणल्या, देशाचा विकास साधला. ते एवढ्यावरच थांबले नाहीत तर आपल्या देशाचा सन्मान संपूर्ण विश्वात करण्याचे काम त्यांनी करत देशाला बहुमान मिळवून दिला आहे. श्रीरंग बारणे यांच्या पाठीशी केंद्र आणि राज्याची ताकद आहे त्यामुळे यापुढेही विकासाची कामे होण्यासाठी त्यांना मतांची मोठी आघाडी मिळाली पाहिजे, यासाठी प्रत्येक कार्यकर्त्याने आपापल्या बुथवर मतांची आघाडी मिळवून द्यावी, असे आवाहनही आमदार प्रशांत ठाकूर यांनी यावेळी केले.
आप्पा बारणे सर्वात जास्त मतांनी विजयी होतील- भाजप नेते बाळासाहेब पाटील
पुन्हा नरेंद्रजी मोदी पंतप्रधान होणार आहेत आणि अबकी बार चारसौ पार होणार आहोत. हाकेला ओ देणारे खासदार श्रीरंग बारणे आहेत. मावळ लोकसभा मतदार संघात सहाही आमदार महायुतीचे आहेत. आमदार प्रशांत ठाकूर यांच्या माध्यमातून पनवेल विधानसभा मतदार संघात मोठ्या प्रमाणात विकासकामे झाली आहेत, त्यामुळे आप्पा बारणे यांना पनवेल मतदार संघातून चांगला मताधिक्य मिळणार आहे. मोदीजींनी जगभरात आपल्या देशाची मान उंचावली त्यामुळे जगात सामर्थ्यवान नेता म्हणून त्यांच्याकडे पाहिले जाते. आमदार प्रशांत ठाकूर यांच्या नेतृत्वाखाली एक लाख मतांची आघाडी मिळणार असून आप्पा बारणे महाराष्ट्रातील सर्वात जास्त मतांनी विजयी होतील.
कोट -
मागील निवडणुकीत पनवेल विधानसभा क्षेत्रातून खासदार श्रीरंग बारणे यांना ५६ हजारांचा लीड दिला होता यावेळी कमीत कमी एक लाख मतांची आघाडी मिळवून देण्याचा निर्धार केला आहे आणि ते तुमच्या सर्वांच्या मेहनतीने आणि आमदार प्रशांत ठाकूर यांनी केलेल्या विकासकामांमुळे शक्य होणार आहे. -
अरुणशेठ भगत, तालुकाध्यक्ष- भाजप
