खारघरमध्ये रेती उपसा करणार्यांवर कारवाई...
पनवेल / (वार्ताहर) : - खारघर परिसरातील कोपरा खाडीमध्ये असलेल्या रेल्वे पुलाजवळ सुरु असलेल्या अनधिकृत रेती उत्खननावर महसूल विभागाचे मंडळ अधिकारी व खारघर पोलिसांनी सयुक्तिक कारवाई केली. याबाबत खारघर पोलीस ठाण्यात रेती साठा करून रेती चोरी करण्याचा प्रयत्न केला म्हणून गुन्हा दाखल करण्यात आला आहे.
खारघर कोपरा येथील खाडीमध्ये रेल्वे पुलाजवळच अवैधरित्या वाळू उपसा होत असल्याबाबतची माहिती पनवेलचे तहसीलदार विजय तळेकर यांना मिळाली होती. यावेळी तळेकर यांच्या मार्गदर्शनाखाली कळंबोलीचे मंडळ अधिकारी संतोष कचरे, मंडळ अधिकारी मोरबे एल राउळ, मंडळ अधिकारी कर्नाळा मनीश जोशी, तलाठी खारघर अंकीता लोखंडे, तलाठी कळंबोली संजय बिक्कड या पथकाने खारघर पोलिसांच्या सहकार्याने कोपरा खाडी रेल्वे पुलाजवळ धाड टाकली. यावेळी काही अज्ञात इसमांनी रेती अनधिकृतपणे सेक्शन पंपाच्या साहाय्याने करून तीन कोंड्यात रेती आढळून आली. सदर पथकातील अधिकार्यांनी जेसीबीच्या मदतीने कोंड्या उद्ध्वस्त केल्या तसेच कटरच्या साहाय्याने सेक्शन पंपचे तुकडे करून खाडीत सोडण्यात आले. यावेळी खारघर पोलीस ठाण्यात अज्ञात चोरटयांविरोधात रेती चोरीचा प्रयत्न केला म्हणुन गुन्हा दाखल करण्यात आला आहे.
