पनवेल, दि.१० (वार्ताहर) ः पनवेल महानगरपालिका अनेक भागात भटक्या व मोकाट कुत्र्यांचा वावर मोठ्या प्रमाणात वाढला आहे. कुत्र्यांची दहशत नागरिकांच्या जीवावर बेतली असून एका मोकाट कुत्र्याने 12 वर्षाच्या मुलावर जबरी हल्ला करून त्याला गंभीरपणे जखमी केल्याची घटना तळोजा येथे घडली आहे.
जखमी झालेल्या मुलाचे नाव आयान काझी असे आहे. तळोजा गावातील मोकाट कुत्र्यांच्या दहशतीमुळे नागरिकांना, महिलांना, वृद्धांना व मुलांना घरातून बाहेर एकटे पडणे मुश्कील झाले आहे. ही मोकाट कुत्री गटागटाने एकत्र फिरतात. लॉकडाऊनमध्ये त्यांना बाहेर पुरेसे खायला मिळत नसल्याने ते आक्रमक होत चालले आहेत. त्यामुळे ते रस्त्यावरुन कोणी सामान घेवून जाताना दिसल्यास किंवा फिरताना दिसल्यास त्यांच्यावर हल्ला करतात व पिशवीतील खाद्य हिसकावून पळून जातात. तरी याबाबत पनवेल महानगरपालिकेने ठोस उपाय योजना करावी अशी मागणी तळोजा परिसरातील रहिवाशी करीत आहेत.
